咩係數字銀行？一文解答晒你對數字銀行嘅疑問
講起數字銀行（Digital Bank）, 可能有部分人仍然會一頭霧水：數字銀行係咩嚟呢？聽落咁虛，係咪靠得住㗎？同傳統銀行又有咩分別呢？無可否認，數字銀行喺香港的確係比較新嘅概念，有部分人甚至從來未接觸過。就等我哋解答一吓大家嘅問題，一齊了解咩喺數字銀行！咩係數字銀行？根據香港金融管理局(金管局)嘅定義，「數字銀行」係指主要透過互聯網或其他形式之電子傳送渠道提供銀行服務，而非實體分行提供零售銀行服務嘅銀行。香港一共有幾多間數字銀行？金管局自2019年先後向8間「數字銀行」發牌，目前香港共有8間受金管局監管嘅數字銀行，而WeLab Bank就係其中一間。無分行？咁數字銀行有咩優勢？- 方便：用戶只需要用一部智能手機，就可以透過手機掃描身份證等方式，進行遙距開戶，更可以全天候24小時使用銀行服務，唔需要再好似傳統銀行咁，去到分行排長龍，既方便又慳時間。
- 不設最低戶口結餘收費：自從金管局向數字銀行發牌之後，雖然有唔少傳統銀行都取消咗最低戶口結餘收費，但仍然有部分銀行無作出呢個改動。如果用戶嘅戶口結餘低於最低要求，就會收取手續費，而數字銀行並無任何關於戶口結餘多少嘅收費，無論財富多少都可以無憂開戶！
- 連接其他銀行：數字銀行可以透過轉數快同埋電子直接付款授權(eDDA)等方式接通其他銀行，跨行即時過數亦無額外手續費，用起上嚟更快、更方便。
- 增加市場競爭：由於數字銀行不設分行，令到營運成本降低，自然可以將資源回饋到用戶身上，例如提供高存款利息、降低貸款利息等等。一方面增加市場競爭，另一方面仲可以令消費者得益。
咁數字銀行嘅客戶有保障嗎？相信唔少第一次接觸數字銀行嘅人，都會擔心將錢存入數字銀行到底有無風險。事實上，數字銀行受金管局嚴格嘅監管㗎！香港所有持牌銀行均屬於香港存款保障委員會（存保會）嘅存款保障計劃成員，所以包括 WeLab Bank在內嘅8間數字銀行，都有參與存款保障計劃，只有幾間境外註冊銀行因為有其註冊地相關嘅存款計劃保障，而獲存保會豁免。存款保障計劃成員所接受嘅合資格存款受存款計劃保障，最高保障額為每名存款人HKD800,000。大家可以參考一吓存保計劃嘅保障範圍：受保障的存款包括：- 各類常見存款戶口（如儲蓄戶口、往來帳戶及年期不多於五年的定期存款）
- 個人（包括聯名戶口）或公司持有的存款
- 用作抵押的存款
不受保障的存款包括：- 結構性存款（如外幣掛鈎及股票掛鈎存款）
- 年期超過五年的定期存款
- 不記名票據（如不記名存款證）
- 離岸存款（如存放於成員銀行在内地或海外辦事處的存款）
留意返有一啲持有有限制牌照嘅銀行同接受存款嘅公司，並唔屬於計劃成員，所以放喺相關銀行或公司嘅存款係唔受存保計劃所保障㗎！你話數字銀行無分行，萬一有嘢要問，咁可以搵邊個幫我？雖然數字銀行主要透過網上途徑去提供服務，但客戶如果遇到任何問題，都可以經唔同途徑搵到客戶服務幫手㗎！以 WeLab Bank 為例，我哋提供 24/7 客戶服務，有咩問題都隨時可以搵到我哋幫手㗎！總括而言，成為數字銀行嘅客戶唔單止有保障，仲可以享有唔少好處㗎！想試新嘢嘅你，即刻下載 WeLab Bank app 同密切留意我哋WeLab Bank嘅資訊啦！ 
