5個創業新手小貼士
厭倦咗朝九晚五嘅打工仔生活，又想嘗試自己做吓小生意？同大家分享5個創業小貼士，睇吓幫唔幫到你啦！ 做自己鍾意嘅事你唔需要非常熱愛整盤生意嘅每一個部分，但至少要享受自己所做嘅事，避免起步無耐就因為厭倦而放棄。當生意係自己熱愛嘅事，話唔定你對呢個領域所擁有嘅知識同技能，都可以幫到你盤生意更上一層樓！ 好喇，咁你可能會問：「我點先知道自己係咪真係鍾意做呢啲嘢呢？」創業之前問吓自己：每次諗起呢盤生意時，你係咪都會感到興奮？你覺得佢值唔值得你投入咁多時間同金錢？如果個答案係「NO」，咁呢盤生意可能未必適合你喇！花啲時間去尋找自己熱愛同擅長嘅領域，再發展其他嘅生意啦！ 充分了解市場環境其中一個創業新手最容易犯嘅錯誤，就係將出色嘅創業想法，放喺一個唔適合發展嘅市場。如果想減低呢個風險，就需要喺創業前做足功課，了解清楚相關市場嘅資訊！不妨試吓同潛在客人傾計，了解佢哋對你即將要推出嘅產品有無興趣、會唔會想購買，如果會考慮購買，咁佢哋又願意付出幾多錢呢？除此之外，揾出潛在嘅競爭者都係成功嘅關鍵之一。透過分析唔同競爭者嘅策略去決定自己嘅商業計劃，例如參觀佢哋嘅舖頭、網頁設計同埋市場活動去獲得靈感，再諗吓如何將自己嘅賣點優化，從而喺眾多嘅競爭中脫穎而出。 準備一個簡單嘅商業計劃成為小老闆之前，記住準備一份商業計劃去整理你嘅諗法同長短目標，等你喺制定市場營銷策略嘅時侯，有更全面同清晰嘅方向，從而避免投放大量時間之後，先發現浪費咗好多冤枉錢去錯嘅地方，繼而迷失方向，最終放棄收場。讀書嘅時候好多時都會要做 SWOT analysis，喺呢個時候就大派用場喇！運用公餘時間創業對於唔少創業新手嚟講，創業初期無任何收入係一件頭痛嘅事，尤其係大家都唔確定呢盤生意係咪一開始就會賺錢。如果不幸撞正經濟衰退，或者用錯咗某啲商業策略，分分鐘仲會蝕錢添！所以，為咗確保有穩定嘅收入來源去支持你嘅小生意，不妨先喺有正職嘅情況下開始創業啦！ 不斷進修學習喺呢個資訊豐富嘅年代，我哋可以輕易地揾到各式各樣嘅免費資源。例如喺YouTube睇到免費嘅教學片、圖書館借到相關嘅工具書、Google到困惑咗你好耐嘅問題等等。透過閱讀更多去增值自己嘅同時，再汲取前人犯錯嘅經驗，就係成功嘅關鍵喇！ 創業從來都唔係一件簡單嘅事，你需要投放大量時間同心機，先會取得成功嘅入場券。希望大家睇完以上嘅資訊，可以對發展你嘅小生意有更清楚嘅方向啦！