「買唔買樓好呢？」生活喺香港，相信大家都成日見到身邊嘅朋友煩惱梗呢個問題。不過煩惱完，都要做決定㗎！今次就同大家睇吓買樓同租樓有咩優點同風險，以及做決定前要考慮嘅因素！ 買樓有咩好處？1.長期投資買樓係唔少香港人進行資產增值嘅方法，而成為業主，唔單止可以喺樓價上升時得到財富嘅增值，仲可以透過租屋賺取被動收入。 2.擁有居住自由你可以喺自己屋企無拘無束咁生活，例如養寵物、換電器、重新裝修屋企等等，基本上無人可以限制到你。 3.夠安定有咗自己層樓，唔止可以令生活安定落嚟，仲係一件值得自豪嘅事嚟㗎！ 買樓嘅風險1.長期責任借樓宇按揭需要你付出一筆巨額首期先，仲要求你之後嘅30年每個月分期付款，係一個年期頗長嘅債務責任。 2.負擔其他費用擁有一個物業，意味住多一份責任。業主需要支付大廈維修費、物業稅同管理費，夾夾埋埋都唔係一筆小數目。 3.流動性較低雖然買樓可以令到生活安定，但都意味著流動性會較低。如果有份好吸引但地理位置距離屋企好遠嘅工作，你未必可以好似租樓咁即刻接受，話搬就搬。 租樓有咩好處？ 1.容易搬遷
當租約完結時，你可以按照自己嘅經濟狀況、喜好以及各項其他因素，搬去任何想住嘅地方。 2.幾乎無需要承擔房屋維修費租戶通常都唔需要承擔房屋嘅各種費用，包括維修費、保養費以及電器安裝費用，例如冷氣機。 3.入場費較低唔需要好似買樓咁一嚟就要付出巨額資金，或者要借樓宇按揭。作為租客，只需要付出保證金，以及每個月嘅月租就解決到住屋問題。 租樓嘅風險1.被驅逐嘅可能始終係租樓，當業主決定賣樓時，你就需要物色下一個居住地方。 2.無裝修自由
作為租戶，好少機會可以對間屋進行大改造。如果咁啱唔好彩租到間居住環境好陳舊嘅屋，好多時只可以將就下。 3.租金唔穩定租金可升可跌，今日你可能交梗一個自己能力範圍內嘅租金，但租約期滿後業主可能有加租嘅可能性。 4.難以累積財富正常情況下，租樓幾乎係無任何投資同儲蓄價值。當租約滿期時，你可以帶走嘅只有你自己同屬於自己嘅傢俬。自己嘅財富無增加到，但業主嘅資產就因為你每個月交嘅租金而增加咗唔少。 咁究竟租樓定買樓好呢？ 雖然錢喺呢到扮演咗一個好重要嘅角色，但當真係決定買樓定租樓時，都有好多其他因素要考慮埋㗎！例如你打算喺呢間屋住幾耐、未來嘅職業方向、人生計劃等等，都係重要嘅考慮因素。 如果你覺得自己係時候喺一個地方安定落嚟，咁買樓可能會啱你多啲。而下一步你要做嘅，就係計吓自己可以承擔到借幾多錢，以及需要儲幾多錢。 如果你覺得呢個世界仲有好多地方等住你去探索、計劃之後移民，咁租樓就會靈活好多，亦會更加適合你喇！ 想有良好嘅信用評級去借貸或做按揭，不妨由控制支出開始啦！
買樓定租樓好？睇下邊個適合你多啲！
